O portavoz municipal nacionalista acha imprescindíbel  “que os rogos e preguntas sexan expostos durante a sesión de cada pleno como até o de agora acontecía. Alén disto  é necesaria a creación da xunta de portavoces como en calquera concello normal, que será a que ordene os asuntos dos Plenos e onde os Grupos poidan chegar a acordos; isto agora non existe, non hai sistema algún que permita unha relación fluída entre os diferentes grupos”

O BNG preguntará no pleno de setembro se o Goberno Local está a dar algún paso de cara á elaboración dun plano lumínico municipal ou de cara a solucionar estas eivas

No BNG consideramos que cómpre preparar ordenanzas de convivencia, froito do incremento exponencial da densidade de poboación no Concello, nomeadamente na época estival

Iván Roca, concelleiro do BNG: «Nesta loita contra os lumes e para evitar a degradación paisaxística todos temos obrigas, as propietarias das leiras, os Concellos e tamén a Xunta. Cumprámolas».

O BNG de Oleiros propón revisar a Ordenanza para non penalizar as persoas residentes e implantar un sistema que exima da ORA a quen faga compras ou xestións

A ORA entra en funcionamento o 1 de xuño, mais os servizos públicos que se prestan nas praias (duchas, socorrismo...) só o fan o día 15

O BNG de Oleiros fixo ver no pleno a súa postura en relación cos anuncios e temas non urxentes a uns días das eleccións, anunciando que non presentaría ningunha proposta «por respecto á veciñanza». Dado que o derradeiro pleno tivo lugar a tan só 3 días dunhas eleccións, no BNG de Oleiros consideramos ilóxico levar asuntos a un pleno que pode mudar absolutamente en cuestión de días. Entendemos que levar asuntos que non sexan urxentes ou que dependan da planificación ou de posicionamentos políticos é pouco respectuoso co proceso electoral que vai ter lugar esta mesma semana.

Por iso, tampouco Iván Roca quixo facer valoracións políticas en relación con asuntos como o «novo» auditorio de Bastiagueiro, que volve ser tema do pleno durante a propia campaña electoral. A única intervención de Roca neste asunto foi para indicar o noso rexeitamento a que se traten estes temas cando os partidos políticos estamos a demandar á cidadanía o seu apoio e non se trata dunha cuestión que requira atención inmediata.

O noso concelleiro e candidato á alcaldía para as eleccións do próximo domingo, Iván Roca, aproveitou para agradecer o traballo dos concelleiros e concelleiras que non se presentan a esta convocatoria.

O candidato, Iván Roca, presentou o programa da formación nacionalista xunto cos números 2 e 3 da candidatura, Iria Taibo e Andrés Hernández Mouriño

Elaborárono de xeito colectivo, escoitando propostas de veciños e veciñas e de diferentes entidades e persoas dos sectores implicados

As propostas do BNG para Oleiros non son medidas illadas, nin entre si nin dos outros concellos da contorna, cos que este concello comparte territorio e problemáticas, e cos que é preciso contar necesariamente para procurar solucións.

No BNG de Oleiros estamos firmemente convencidos e convencidas de que é preciso mudar o modelo e entender o noso concello como un todo, xa que os problemas do prezo e da dispersión da vivenda teñen consecuencias para a mobilidade, para o emprego e o comercio, mais tamén para o medio ambiente ou para a conciliación.

Estas son algunhas das principais medidas que propomos para os próximos catro anos:

1. O acceso á vivenda é un dereito fundamental, debemos recuperar a porcentaxe de promoción pública municipal en todas as promocións novas previstas, en todas as áreas do concello, ademais de abrir unha liña de axudas ao alugamento e outra para a rehabilitación de vivendas.

2. Consideramos que Oleiros ten moita marxe de mellora no ámbito do medio ambiente: cremos que é preciso crear unha Concellaría de Medio Ambiente, adaptar as políticas á situación de emerxencia climática ou avanzar na protección de áreas en situación de perigo.

3. Moitas persoas de Oleiros teñen emprego noutros concellos da nosa área, o que aumenta a problemática da mobilidade e a falta de cohesión, polo que propomos unha forte política de promoción da creación de emprego, e incentivos ás empresas existentes, ademais dun importante compromiso coas empresas con carácter social.

4. O Plan de Mobilidade Urbana Sustentábel do Concello de Oleiros, aprobado en setembro de 2022, fai un diagnóstico moi completo e propón unha gran variedade de medidas coas que concordamos plenamente e comprometémonos coa súa aplicación, ademais de coa divulgación do propio Plan, que nos parece unha guía moi útil para os próximos anos: é imprescindíbel dar prioridade á mobilidade alternativa ao vehículo privado, ademais de repensar o modelo de dispersión da poboación e facilitar que todas as parroquias teñan ao seu alcance os servizos máis básicos.

5. Apoiaremos o comercio local con diferentes medidas de incentivo á creación de novos negocios e campañas de divulgación e promoción dos comercios existentes e sensibilización sobre a importancia do comercio de proximidade, ademais de iniciativas de formación.

6. A transparencia e participación son unha eiva importante deste concello. Precisamos que tanto os partidos da oposición como toda a cidadanía teñan un maior acceso á información sobre o uso do diñeiro público, e aos medios de comunicación municipais. Propomos a creación dun regulamento de participación cidadá.

7. Cremos que é preciso dar un paso máis aló na actividade cultural deste concello, facendo que a política neste ámbito non se basee unicamente na programación de espectáculos, promovendo a cultura de base e deseñando programas con obxectivos a longo prazo, implicando as distintas entidades do concello e promovendo a súa existencia e actividade.

8. Cómpre introducir melloras e innovacións nas diferentes políticas dirixidas ao benestar social da poboación, en xeral, e das persoas e colectivos máis desfavorecidos, en particular. Corrixir a ordenanza que regula as axudas de emerxencia social para permitir que manteñan o seu poder adquisitivo neste contexto de gran suba dos prezos, crear un recurso de aloxamento para as mulleres vítimas da violencia de xénero, incrementar a formación sobre a violencia de xénero e sexual ao persoal municipal que traballe no eido do lecer, ou a posta en marcha dun servizo de coidado de nenos e nenas son algunhas das medidas máis urxentes que é preciso acometer.

9. Profundizaremos na promoción da lingua galega, impulsando iniciativas de dinamización e sensibilización social, ademais de retomar o Premio Xulio Dans.

10. O BNG sempre traballa desde unha perspectiva comarcal e de país, pois non podemos vivir de costas aos concellos da contorna, cos que xa compartimos moitas problemáticas e servizos. Traballaremos para conseguir a creación da Área Metropolitana da Coruña.