Con independencia da partida económica incluída no modificativo de crédito aprobado no Pleno celebrado onte, desde o BNG seguiremos a solicitar toda a información posíbel sobre un proceso de moitísimo calado, talvez unha das máis importantes transformacións operadas no municipio no que ten a ver coa xestión dos servizos, neste caso un tan fundamental e universal como é o do abastecemento da auga.
Nós defendemos como principio político a xestión directa dos servizos públicos sempre que sexa viábel, técnica e economicamente, implementala naqueles casos en que ditos servizos viñan estando privatizados. Neste sentido, e aínda desde a prudencia, valoramos como algo positivo que, por vez primeira en moitos anos, o Concello opte pola xestión directa dun servizo público. Neste sentido, recordamos que no mandato pasado xa propuxera estudar a viabilidade da xestión directa das piscinas municipais no momento en que estaba próxima a caducar a concesión vixente naquel momento, rexeitando de aquela o goberno local dita proposta.

Malia de entrada non ver con malos ollos que se municipalice un servizo que desde 1990 vén prestando ininterrompidamente a empresa Sergesco, durante anos mediante o cuestionábel procedemento de prórrogas tácitas anuais, preferimos ser cautos polo de agora á hora de fixar a nosa posición definitiva e apelamos a rodear o proceso de municipalización da máxima transparencia á hora de definir os pasos a seguir.

Segundo o noso portavoz municipal, Xurxo Martínez Caño, “o BNG faise en alto as mesmas preguntas razoábeis que pode estar a facerse calquera veciña ou veciño de Oleiros”, isto é: crearase unha empresa municipal de capital e xestión pública partindo de cero? Optarase, na práctica, unicamente por subrogar o persoal actual de Sergesco e manterase a actual estrutura da empresa? Como vai afectar á prestación do servizo a xestión directa? Tamén vemos de moito interese saber se os grupos municipais, ou mesmo o tecido asociativo veciñal, terán algún tipo de participación por medio de mecanismos de control democrático propios de calquera empresa ou ente público.

Atendendo sen o dubidar o ofrecemento de Sergesco a facilitar información efectuado o pasado mércores a través dun medio de comunicación, onte Xurxo Martínez Caño achegouse á sede da empresa para manter un encontro co seu xerente, Heitor Cruz. Neste encontro, moi cordial, Cruz agradeceu a Martínez Caño que durante o pasado mandato o BNG formulase propostas “en positivo” para a mellora do servizo que presta Sergesco, como a renovación da páxina web, a introdución da versión da mesma en galego ou a incorporación dun formulario de envío de queixas e incidencias que tivo, en palabras do xerente, unha “acollida formidábel”.