O acceso á vivenda é un dereito, non un luxo. Un concello con elevada renda media como Oleiros debe asumir unha maior responsabilidade pública para garantir que a mocidade, as familias traballadoras e as persoas maiores poidan desenvolver o seu proxecto de vida sen seren expulsadas polo incremento continuado dos prezos.

Por isto, desde o BNG de Oleiros faremos propostas que poden ser asumidas desde as competencias que corresponden a un concello, varias iniciativas e variadas medidas para reverter esta situación, como:

• Declarar as zonas tensionadas para aplicar os mecanismos previstos na Lei estatal de Vivenda.
• Impulsar un parque público municipal de alugueiro asequible mediante adquisición, rehabilitación e mobilización de vivendas baleiras.
• Priorizar a rehabilitación fronte á expansión urbanística, reducindo consumo de solo e emisións.
• Ceder solo municipal para cooperativas ou alugueiro accesíbel.
• Mobilizar vivendas baleiras mediante programas municipais.
• Establecer bonificacións fiscais condicionadas ao alugueiro accesíbel.
• Pór en marcha axudas municipais á rehabilitación vinculadas ao alugueiro.
• Crear unha bolsa municipal de alugueiro con garantías.
• Abrir unha oficina municipal de mediación e garantía do alugueiro.

Algunhas destas medidas teñen un impacto directo sobre os prezos e outras aumentan a oferta de alugueiro estábel, que é a vía máis eficaz para conter os prezos a medio prazo. A Lei de Vivenda de Galiza recoñece aos concellos competencias para programar políticas municipais de vivenda, promover e xestionar vivenda, fomentar a rehabilitación, inspeccionar e sancionar determinados incumprimentos e executar gasto público en materia de vivenda. O BNG de Oleiros levará estas propostas ao vindeiro pleno ordinario do mes de xullo.